wrapper

أحدث الموضوعات

صلاح جاهين على اسم مصر التاريخ يقدر يقول ما شاء
وأنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة ف حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب

على اسم مصر
مصر النسيم في الليالي وبياعين الفل
ومرايه بهتانة ع القهوة - أزورها - واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
على اسم مصر
مصر السما الفزدقي وعصافير معدية
والقلة مملية على الشباك - مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
النخل في العالي والنيل ماشي طوالي
معكوسة فيه الصـور - مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي - وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولد من جديد
على اسم مصر

صلاح جاهين

 

Related items

  • الكشوف النهائية لمرشحى محافظة المنوفية

    المرحلة الثانية تشمل المنوفية دائرتين قوائم وأربع دوائر فردى ، الدائرة الأولى قوائم وتشمل (شبين الكوم - مركز شبين الكوم - مركز قويسنا - مركز تلا - مركز بركة السبع - مركز الشهداء ) الدائرة الثانية وتشمل (مركز أشمون - مركز الباجور - مركز منوف - منوف - مركز السادات - سرس الليان ) ودوائر الفردى ، الدائرة الأولى تشمل (شبين الكوم - مركز شبين الكوم - مركز قويسنا ) والدائرة الثانية فردى (مركز تلا - مركز بركة السبع - مركز الشهداء ) وتشمل  الدائرة الثالثة ( مركز أشمون - مركز الباجور ) والدائرة الرابعة (مركز منوف - منوف - مركز السادات - سرس الليان ) وفيما يلى بيان بمرشحى المحافظة فردى وقائمة :

     

    أولاً القوائم

    ثانياً : الفردى